اتنی جلوہ باریاں ہیں پھر بھی پنہاں کون ہے

اتنی جلوہ باریاں ہیں پھر بھی پنہاں کون ہے

اتنی پردہ داریاں ہیں پھر نمایاں کون ہے

کل فروغ آفتاب و ماہ و انجم کون تھا

اب چراغ گوشۂ تاریک زنداں کون ہے

وہ بت کافر لئے خنجر یہ کرتا ہے سوال

میرے اس دور ترقی میں مسلماں کون ہے

میری اک اک مسکراہٹ میں رہا گل پاش کون

آج میرے آنسوؤں میں شبنم افشاں کون ہے

دانۂ صیاد کو ٹھکرا کے آئے دام میں

ہم سا دانا کون ہوگا ہم سا ناداں کون ہے

خود قفس بھی جل اٹھا جس کے نفس کی آنچ سے

بلبلو یہ نو گرفتار غزل خواں کون ہے