اتنی خوشبو تو ملاقات میں رہنے دیجے

اتنی خوشبو تو ملاقات میں رہنے دیجے

اپنی پہچان مری ذات میں رہنے دیجے

شہر میں اور نئے زخم نہ اگنے پائیں

شاہزادوں کو حوالات میں رہنے دیجے

سر چلا جائے یہ دستار نہ جانے پائے

اتنا تیور تو روایات میں رہنے دیجے

کل کی ٹوٹی ہوئی دیوار کے کام آئیں گی

جتنی اینٹیں ہیں حسابات میں رہنے دیجے

کب یہ کہتا ہوں کہ میں کوئی ولی زادہ ہوں

خاکساری ہی کرامات میں رہنے دیجے

آپ کے شہر میں سورج تو نکلنے سے رہا

ایک مشعل ہی مرے ہات میں رہنے دیجے

آگ اور پھول کی پہچان نہیں جس کو ریاضؔ

ایسے انسان کو خطرات میں رہنے دیجے