اتنی قدرت جو جگمگاتی ہے

اتنی قدرت جو جگمگاتی ہے

تیل اس کا اسی کی باتی ہے

کتنی نازک ہے سانس کی ڈوری

ایک جھٹکے میں ٹوٹ جاتی ہے

دل کی دھڑکن تجھے پتہ ہے کیا

تیری ہستی کو آزماتی ہے

شکر اس کا نہ بھولنا ہرگز

صبح تجھ کو جو شے جگاتی ہے

مجھ کو ہر دم ہی زندگی میری

اپنا آدھا پتہ بتاتی ہے

جیت جاتی ہیں نفرتیں ہر دم

بس محبت ہی مات کھاتی ہے

موت تجھ تک یہ زندگی آخر

کتنی مشکل سے خود کو لاتی ہے

ٹوٹ جانے کے ڈر سے اکثر ہی

نیند آتے ہی لوٹ جاتی ہے