itni si zindagi bhi hai kitni garan mujhe

itnī sī zindagī bhī hai kitnī garāñ mujhe

denā hai gaam gaam abhī imtihāñ mujhe

raste meñ taar taar bikher aa.e the jise

luuTe hai shaam shaam vahī dāstāñ mujhe

achchhā huā ki jal ga.ī tinkoñ kī kā.enāt

ab to na deñgī ta.ana kabhī bijliyāñ mujhe

husn-e-fareb merā mizāj-e-suḳhan nahīñ

rakhiyo muaaf is se magar dostāñ mujhe

aap aa ga.e to kaalī ghaTā bhī baras paḌī

aatā hai varna harf-e-shikāyat kahāñ mujhe

qismat kī baat kahiye ki ye vaqt kā qusūr

ab mehrbāñ bhī ban ga.e nā-mehrbāñ mujhe

ye dhuñdlā dhuñdlā naqsh ye yādeñ ye shām-e-ġham

le jā rahā hai vaqt na jaane kahāñ mujhe

yādash-ba-ḳhair 'nāzish'-e-āvāra chal basā

dīvāna de gayā hai magar dhajjiyāñ mujhe

itni si zindagi bhi hai kitni garan mujhe

dena hai gam gam abhi imtihan mujhe

raste mein tar tar bikher aae the jise

luTe hai sham sham wahi dastan mujhe

achchha hua ki jal gai tinkon ki kaenat

ab to na dengi tana kabhi bijliyan mujhe

husn-e-fareb mera mizaj-e-suKHan nahin

rakhiyo muaf is se magar dostan mujhe

aap aa gae to kali ghaTa bhi baras paDi

aata hai warna harf-e-shikayat kahan mujhe

qismat ki baat kahiye ki ye waqt ka qusur

ab mehrban bhi ban gae na-mehrban mujhe

ye dhundla dhundla naqsh ye yaaden ye sham-e-gham

le ja raha hai waqt na jaane kahan mujhe

yaadash-ba-KHair 'nazish'-e-awara chal basa

diwana de gaya hai magar dhajjiyan mujhe