ittifaqan hui saqi teri guftar ghalat

ittifāqan huī saaqī tirī guftār ġhalat

jaise kahne lagā har baat ko mai-ḳhvār ġhalat

tum ko hotā hai yaqīñ hotī hai takrār ġhalat

roz ik baat kahā karte haiñ aġhyār ġhalat

dil mirā taakā thā aur zaḳhm jigar par maarā

kyā tirā haath paḌā aaj sitamgār ġhalat

sar mirā kaaT le jallād na uf niklegī

kabhī kahne kā nahīñ terā vafādār ġhalat

hosh meñ aa ke lagā zaḳhm zarā o qātil

tere ghabrāne se paḌ jaatī hai talvār ġhalat

jo vo kahtā hai masīhā to yaqīñ lā us ko

haal kahne kā nahīñ hai tirā bīmār ġhalat

vo jo kuchh kahte haiñ aġhyār vahī kahte haiñ

apnī ham baat ko kah dete haiñ nā-chār ġhalat

chheḌne ko unheñ maiñ baat kiye jaatā huuñ

mere kahne ko vo kah dete haiñ har baar ġhalat

roz kahtā hai na jā.ūñgā maiñ un zulfoñ meñ

dil-e-nādāñ tirā ho jaatā hai inkār ġhalat

qabr meñ aane kahā hai to 'shafīq' aa.egā

kabhī kahne kā nahīñ merā madad-gār ġhalat

ittifaqan hui saqi teri guftar ghalat

jaise kahne laga har baat ko mai-KHwar ghalat

tum ko hota hai yaqin hoti hai takrar ghalat

roz ek baat kaha karte hain aghyar ghalat

dil mera taka tha aur zaKHm jigar par mara

kya tera hath paDa aaj sitamgar ghalat

sar mera kaT le jallad na uf niklegi

kabhi kahne ka nahin tera wafadar ghalat

hosh mein aa ke laga zaKHm zara o qatil

tere ghabrane se paD jati hai talwar ghalat

jo wo kahta hai masiha to yaqin la us ko

haal kahne ka nahin hai tera bimar ghalat

wo jo kuchh kahte hain aghyar wahi kahte hain

apni hum baat ko kah dete hain na-chaar ghalat

chheDne ko unhen main baat kiye jata hun

mere kahne ko wo kah dete hain har bar ghalat

roz kahta hai na jaunga main un zulfon mein

dil-e-nadan tera ho jata hai inkar ghalat

qabr mein aane kaha hai to 'shafiq' aaega

kabhi kahne ka nahin mera madad-gar ghalat