izhaar-e-aqidat mein kahan tak nikal aae

iz.hār-e-aqīdat meñ kahāñ tak nikal aa.e

ham ahl-e-yaqīñ vahm-o-gumāñ tak nikal aa.e

shādāb bahāroñ ke tamannā.ī kahāñ haiñ

mausam ke qadam zaḳhm-e-ḳhizāñ tak nikal aa.e

ye kaisā alam hai ki garebāñ ho salāmat

aur āñkhoñ se ḳhuuñ bhī rag-e-jāñ tak nikal aa.e

kab niklegī dīvānoñ kī bārāt gharoñ se

sīnoñ meñ baġhāvat ke nishāñ tak nikal aa.e

maqtal meñ bahattar bhī nahīñ nikle haiñ ab ke

dargāhoñ meñ sab pīr-o-javāñ tak nikal aa.e

ab to na karo rāh-numāoñ kī shikāyat

aḳhbāroñ meñ ab un ke bayāñ tak nikal aa.e

ab kaun sar-e-dār nazar aa.egā 'fāriġh'

jab ahl-e-junūñ sūd-o-ziyāñ tak nikal aa.e

izhaar-e-aqidat mein kahan tak nikal aae

hum ahl-e-yaqin wahm-o-guman tak nikal aae

shadab bahaaron ke tamannai kahan hain

mausam ke qadam zaKHm-e-KHizan tak nikal aae

ye kaisa alam hai ki gareban ho salamat

aur aankhon se KHun bhi rag-e-jaan tak nikal aae

kab niklegi diwanon ki baraat gharon se

sinon mein baghawat ke nishan tak nikal aae

maqtal mein bahattar bhi nahin nikle hain ab ke

dargahon mein sab pir-o-jawan tak nikal aae

ab to na karo rah-numaon ki shikayat

aKHbaron mein ab un ke bayan tak nikal aae

ab kaun sar-e-dar nazar aaega 'farigh'

jab ahl-e-junun sud-o-ziyan tak nikal aae