izhaar-e-haqiqat ki jasarat nahin hoti

iz.hār-e-haqīqat kī jasārat nahīñ hotī

bāġhī huuñ magar us se baġhāvat nahīñ hotī

ik marhala aisā bhī to aatā hai junūñ meñ

ḳhalvat meñ bhī jab lazzat-e-ḳhalvat nahīñ hotī

ham ma.abad-e-irfāñ ke pujārī haiñ azal se

ham se shab-e-dījūr kī bai'at nahīñ hotī

kuchh bhī use kah lījiye insān na kahiye

vo jis ko ḳhatāoñ pe nadāmat nahīñ hotī

ye kaam mire bas meñ nahīñ maslahatan bhī

mujh se kabhī bātil kī vakālat nahīñ hotī

yuuñ qahr-e-ḳhudāvand se Dartā to bahut huuñ

lekin kabhī taufīq-e-ibādat nahīñ hotī

āñkhoñ se mire niiñd uchak le gayā koī

ḳhvāboñ meñ bhī ab us kī ziyārat nahīñ hotī

izhaar-e-haqiqat ki jasarat nahin hoti

baghi hun magar us se baghawat nahin hoti

ek marhala aisa bhi to aata hai junun mein

KHalwat mein bhi jab lazzat-e-KHalwat nahin hoti

hum mabad-e-irfan ke pujari hain azal se

hum se shab-e-dijur ki bai'at nahin hoti

kuchh bhi use kah lijiye insan na kahiye

wo jis ko KHataon pe nadamat nahin hoti

ye kaam mere bas mein nahin maslahatan bhi

mujh se kabhi baatil ki wakalat nahin hoti

yun qahr-e-KHudawand se Darta to bahut hun

lekin kabhi taufiq-e-ibaadat nahin hoti

aankhon se mere nind uchak le gaya koi

KHwabon mein bhi ab us ki ziyarat nahin hoti