izhaar-e-jazba-e-dil-e-poshida dekhna

iz.hār-e-jazba-e-dil-e-poshīda dekhnā

ab phuul ḳhud haiñ ḳhaar ke girvīda dekhnā

ahd-e-ravāñ kā jalva-e-shorīda dekhnā

bedār jo hai fitna-e-ḳhvābīda dekhnā

terī bisāt-e-jabr-o-tashaddud ulaT na jaa.e

ab ke to ham bhī ho ga.e sanjīda dekhnā

saa.e pe zindagī ke na kar is qadar ghamanD

dīvār us kī kab se hai bosīda dekhnā

tark-e-ta.alluqāt kā khul jā.egā bharam

mahfil meñ yuuñ na phir mujhe duzdīda dekhnā

ḳhud vaqt hī batā.egā vo din ḳhudā kare

tujh ko bhī ghar kī aag meñ nam-dīda dekhnā

hotā hai jo bhī ġham vo ubhartā hai kab yahāñ

galiyāñ haiñ shahr-e-ishq kī pechīda dekhnā

sahbā-e-ġham se shīsha-e-dil par na kyoñ rahe

tasvīr us pe hai koī chaspīda dekhnā

aatā hai intiqām bhī lenā magar 'kalīm'

dil chāhtā nahīñ use ranjīda dekhnā

izhaar-e-jazba-e-dil-e-poshida dekhna

ab phul KHud hain KHar ke girwida dekhna

ahd-e-rawan ka jalwa-e-shorida dekhna

bedar jo hai fitna-e-KHwabida dekhna

teri bisat-e-jabr-o-tashaddud ulaT na jae

ab ke to hum bhi ho gae sanjida dekhna

sae pe zindagi ke na kar is qadar ghamanD

diwar us ki kab se hai bosida dekhna

tark-e-talluqat ka khul jaega bharam

mahfil mein yun na phir mujhe duzdida dekhna

KHud waqt hi bataega wo din KHuda kare

tujh ko bhi ghar ki aag mein nam-dida dekhna

hota hai jo bhi gham wo ubharta hai kab yahan

galiyan hain shahr-e-ishq ki pechida dekhna

sahba-e-gham se shisha-e-dil par na kyon rahe

taswir us pe hai koi chaspida dekhna

aata hai intiqam bhi lena magar 'kalim'

dil chahta nahin use ranjida dekhna