اظہار جذبۂ دل پوشیدہ دیکھنا

اظہار جذبۂ دل پوشیدہ دیکھنا

اب پھول خود ہیں خار کے گرویدہ دیکھنا

عہد رواں کا جلوۂ شوریدہ دیکھنا

بیدار جو ہے فتنۂ خوابیدہ دیکھنا

تیری بساط جبر و تشدد الٹ نہ جائے

اب کے تو ہم بھی ہو گئے سنجیدہ دیکھنا

سائے پہ زندگی کے نہ کر اس قدر گھمنڈ

دیوار اس کی کب سے ہے بوسیدہ دیکھنا

ترک تعلقات کا کھل جائے گا بھرم

محفل میں یوں نہ پھر مجھے دزدیدہ دیکھنا

خود وقت ہی بتائے گا وہ دن خدا کرے

تجھ کو بھی گھر کی آگ میں نم دیدہ دیکھنا

ہوتا ہے جو بھی غم وہ ابھرتا ہے کب یہاں

گلیاں ہیں شہر عشق کی پیچیدہ دیکھنا

صہبائے غم سے شیشۂ دل پر نہ کیوں رہے

تصویر اس پہ ہے کوئی چسپیدہ دیکھنا

آتا ہے انتقام بھی لینا مگر کلیمؔ

دل چاہتا نہیں اسے رنجیدہ دیکھنا