اظہار محبت کی تمنا تو ہے کب سے

اظہار محبت کی تمنا تو ہے کب سے

حسرت تھی کہ یہ لفظ ادا ہو ترے لب سے

شبنم ہے ترے رخ کے پسینے سے عبارت

ہے خندۂ گل عکس ترے خندۂ لب سے

ایسا بھی کسی سے کوئی شاید نہ جدا ہو

یوں آپ سے بچھڑے کہ جدا ہو گئے سب سے

ڈرتا ہوں کہ پھر کوئی قیامت نہ گزر جائے

پھر صبح کے آثار ہیں تاریکئ شب سے

کیا کیا نہ دئے نام زمانے نے وفا کو

کیا کیا نہ ہوا تیری خموشی کے سبب سے

کاش ان کو بھی ہو پرسش احوال کی توفیق

ہم نقش بہ دیوار ہیں کیا جانیے کب سے

جس دن سے گیا ہے کوئی گھر چھوڑ کے افضلؔ

اس گھر کے شب و روز بھی لگتے ہیں عجب سے