izhaar-e-mohabbat ki tamanna to hai kab se

iz.hār-e-mohabbat kī tamanna to hai kab se

hasrat thī ki ye lafz adā ho tire lab se

shabnam hai tire ruḳh ke pasīne se 'ibārat

hai ḳhanda-e-gul 'aks tire ḳhanda-e-lab se

aisā bhī kisī se koī shāyad na judā ho

yuuñ aap se bichhḌe ki judā ho ga.e sab se

Dartā huuñ ki phir koī qayāmat na guzar jaa.e

phir sub.h ke āsār haiñ tārīkī-e-shab se

kyā kyā na diye naam zamāne ne vafā ko

kyā kyā na huā terī ḳhamoshī ke sabab se

kaash un ko bhī ho pursish-e-ahvāl kī taufīq

ham naqsh-ba-dīvār haiñ kyā jāniye kab se

jis din se gayā hai koī ghar chhoḌ ke 'afzal'

is ghar ke shab-o-roz bhī lagte haiñ 'ajab se

izhaar-e-mohabbat ki tamanna to hai kab se

hasrat thi ki ye lafz ada ho tere lab se

shabnam hai tere ruKH ke pasine se 'ibarat

hai KHanda-e-gul 'aks tere KHanda-e-lab se

aisa bhi kisi se koi shayad na juda ho

yun aap se bichhDe ki juda ho gae sab se

Darta hun ki phir koi qayamat na guzar jae

phir subh ke aasar hain tariki-e-shab se

kya kya na diye nam zamane ne wafa ko

kya kya na hua teri KHamoshi ke sabab se

kash un ko bhi ho pursish-e-ahwal ki taufiq

hum naqsh-ba-diwar hain kya jaaniye kab se

jis din se gaya hai koi ghar chhoD ke 'afzal'

is ghar ke shab-o-roz bhi lagte hain 'ajab se