iztirab-e-gham se hasil hai sukun-e-dil mujhe

iztirāb-e-ġham se hāsil hai sukūn-e-dil mujhe

ab koī mushkil nazar aatī nahīñ mushkil mujhe

chalte hī jaadū mire dil par fareb-e-husn kā

kar diyā āġhāz ne anjām se ġhāfil mujhe

merī ḳhush-fahmī hai yā hai merī āñkhoñ kā qusūr

mauj meñ aa.e nazar nazzāra-e-sāhil mujhe

mahfil-e-ishrat na ban jaa.e kahīñ mātam-kada

is liye uThne nahīñ detā hai dard-e-dil mujhe

be-ḳhudī hī be-ḳhudī hai ai nigāh-e-shuq-e-dīd

vo mujhe hāsil hai lekin kyā huā hāsil mujhe

kho diyā mujh ko fareb-e-justujū-e-yār ne

haa.e manzil bhī nahīñ miltī sar-e-manzil mujhe

aa ga.ī kaam aa ga.ī 'ahsan' mirī dīvāngī

vo samajhne lag ga.e zanjīr ke qābil mujhe

iztirab-e-gham se hasil hai sukun-e-dil mujhe

ab koi mushkil nazar aati nahin mushkil mujhe

chalte hi jadu mere dil par fareb-e-husn ka

kar diya aaghaz ne anjam se ghafil mujhe

meri KHush-fahmi hai ya hai meri aankhon ka qusur

mauj mein aae nazar nazzara-e-sahil mujhe

mahfil-e-ishrat na ban jae kahin matam-kada

is liye uThne nahin deta hai dard-e-dil mujhe

be-KHudi hi be-KHudi hai ai nigah-e-shuq-e-did

wo mujhe hasil hai lekin kya hua hasil mujhe

kho diya mujh ko fareb-e-justuju-e-yar ne

hae manzil bhi nahin milti sar-e-manzil mujhe

aa gai kaam aa gai 'ahsan' meri diwangi

wo samajhne lag gae zanjir ke qabil mujhe