اضطراب غم سے حاصل ہے سکون دل مجھے

اضطراب غم سے حاصل ہے سکون دل مجھے

اب کوئی مشکل نظر آتی نہیں مشکل مجھے

چلتے ہی جادو مرے دل پر فریب حسن کا

کر دیا آغاز نے انجام سے غافل مجھے

میری خوش فہمی ہے یا ہے میری آنکھوں کا قصور

موج میں آئے نظر نظارۂ ساحل مجھے

محفل عشرت نہ بن جائے کہیں ماتم کدہ

اس لئے اٹھنے نہیں دیتا ہے درد دل مجھے

بے خودی ہی بے خودی ہے اے نگاہ شوق دید

وہ مجھے حاصل ہے لیکن کیا ہوا حاصل مجھے

کھو دیا مجھ کو فریب جستجوئے یار نے

ہائے منزل بھی نہیں ملتی سر منزل مجھے

آ گئی کام آ گئی احسنؔ مری دیوانگی

وہ سمجھنے لگ گئے زنجیر کے قابل مجھے