iztirab-e-KHud-numai-o-haya mein farq hai

iztirāb-e-ḳhud-numā.ī-o-hayā meñ farq hai

ham samajhte haiñ jo un kī har adā meñ farq hai

dosto ijmāl kī tafsīl kā mauqa' nahīñ

maiñ ye kahtā huuñ ki iḳhlās-o-riyā meñ farq hai

ek iqdām-e-yaqīñ hai dūsrā shak-āshnā

e'tirāf-e-laġhzish-e-‘uzr-o-ḳhatā meñ farq hai

haal chehre se 'ayāñ hotā hai lafzoñ se nahīñ

yā'nī ab mā’nan sukūt-o-iltijā meñ farq hai

ek hī 'ālam meñ haiñ sab jāda-paimā-e-'adam

vaise hone ko yahāñ shāh-o-gadā meñ farq hai

ek tūfānoñ pe qādir ek tūfāñ-āzmā

ye haqīqat hai ḳhudā-o-nā-ḳhudā meñ farq hai

is kā pahle faisla ho qāfila kyūñkar luTā

ye ġhalat hai rahzan-o-jāda-numā meñ farq hai

chaḌhte sūraj ke pujārī Dūbtā sūraj bhī dekh

ye batānā hai zavāl-o-irtiqā meñ farq hai

vaj.h-e-mahrūmī hai merī shān-e-istiġhnā 'urūj'

dast-kash meñ aur dast-e-nā-rasā meñ farq hai

iztirab-e-KHud-numai-o-haya mein farq hai

hum samajhte hain jo un ki har ada mein farq hai

dosto ijmal ki tafsil ka mauqa' nahin

main ye kahta hun ki iKHlas-o-riya mein farq hai

ek iqdam-e-yaqin hai dusra shak-ashna

e'tiraf-e-laghzish-e-‘uzr-o-KHata mein farq hai

haal chehre se 'ayan hota hai lafzon se nahin

ya'ni ab ma’nan sukut-o-iltija mein farq hai

ek hi 'alam mein hain sab jada-paima-e-'adam

waise hone ko yahan shah-o-gada mein farq hai

ek tufanon pe qadir ek tufan-azma

ye haqiqat hai KHuda-o-na-KHuda mein farq hai

is ka pahle faisla ho qafila kyunkar luTa

ye ghalat hai rahzan-o-jada-numa mein farq hai

chaDhte suraj ke pujari Dubta suraj bhi dekh

ye batana hai zawal-o-irtiqa mein farq hai

wajh-e-mahrumi hai meri shan-e-istighna 'uruj'

dast-kash mein aur dast-e-na-rasa mein farq hai