izzat unhen mili wahi aaKHir baDe rahe

izzat unheñ milī vahī āḳhir baḌe rahe

jo ḳhaak ho ke aap ke dar par paḌe rahe

ai dost muġhtanim haiñ vo murādān-e-bā-vaqār

usrat meñ bhī jo aan pe apnī aḌe rahe

pāyāb ho ke sail ne un ke qadam liye

mañjdhār meñ jo paañv jamā.e khaḌe rahe

paḌtī nahīñ har ek pe us kī nigāh-e-nāz

saaqī ke āstāñ pe hazāroñ paḌe rahe

apnoñ kī talḳh-goī kī lazzat na pūchhiye

bhāle se umr bhar rag-e-jāñ meñ gaḌe rahe

mānind-e-sañg-e-mīl dikhā.ī har ik ko raah

lekin ḳhud apne paañv zamīñ meñ gaḌe rahe

zālim se ek bose pe barsoñ rahī hai zid

āḳhir tak apnī baat pe ham bhī aḌe rahe

shāyad ki multafit ho koī shahsavār-e-nāz

kis aarzū se ham sar-e-manzil khaḌe rahe

fitne bahut haiñ but-kada o ḳhānqāh meñ

achchhe rahe jo dasht-e-junūñ meñ paḌe rahe

'vāsif' kā intizār thā sahrā meñ bād-e-qais

kāñTe bhī muddatoñ yūñhī pyāse paḌe rahe

izzat unhen mili wahi aaKHir baDe rahe

jo KHak ho ke aap ke dar par paDe rahe

ai dost mughtanim hain wo muradan-e-ba-waqar

usrat mein bhi jo aan pe apni aDe rahe

payab ho ke sail ne un ke qadam liye

manjdhaar mein jo panw jamae khaDe rahe

paDti nahin har ek pe us ki nigah-e-naz

saqi ke aastan pe hazaron paDe rahe

apnon ki talKH-goi ki lazzat na puchhiye

bhaale se umr bhar rag-e-jaan mein gaDe rahe

manind-e-sang-e-mil dikhai har ek ko rah

lekin KHud apne panw zamin mein gaDe rahe

zalim se ek bose pe barson rahi hai zid

aaKHir tak apni baat pe hum bhi aDe rahe

shayad ki multafit ho koi shahsawar-e-naz

kis aarzu se hum sar-e-manzil khaDe rahe

fitne bahut hain but-kada o KHanqah mein

achchhe rahe jo dasht-e-junun mein paDe rahe

'wasif' ka intizar tha sahra mein baad-e-qais

kanTe bhi muddaton yunhi pyase paDe rahe