ja ke pachhtaenge na ja ke bhi pachhtaiyega

jā ke pachhtā.eñge na jā ke bhī pachhtā.iyegā

aap jaate haiñ vahāñ achchhā chale jā.iyegā

maiñ ka.ī din hue ḳhud se hī jhagaḌ baiThā huuñ

aap fursat se kisī din mujhe samjhā.iyegā

maiñ ḳhayāloñ meñ bhaTak jaatā huuñ baiThe baiThe

bhej aahaT kā sandesa mujhe bulvā.iyegā

maiñ ne zulmat meñ guzāre haiñ ka.ī qarn so aap

raushnī se jo maiñ Dar jā.ūñ na ghabrā.iyegā

maiñ samajhtā huuñ mujhe log samajhte hī nahīñ

maiñ kisī roz na samjhūñ to samajh jā.iyegā

gaah ho jaatā huuñ maiñ apnī anā kā qaidī

maiñ na aa.uuñ to phir aa kar mujhe chhuḌvā.egā

ḳhair-maqdam ko hai tayyār jahāñ jā.iye aap

haañ palaTnā ho to phir mere hī ho jā.iyegā

mujh se zid hai to phir us zid ko nibhāne ke liye

maiñ jo mar jā.ūñ to phir aap bhī mar jā.iyegā

jām-e-jam fikr kā rakhtā hai nirāle manzar

aap jo dekhte haiñ duniyā ko dikhlā.iyegā

soch jab yaksāñ na ho qāfila kis kaam kā hai

aap 'ahmad' kahīñ raste meñ hī rah jā.iyegā

ja ke pachhtaenge na ja ke bhi pachhtaiyega

aap jate hain wahan achchha chale jaiyega

main kai din hue KHud se hi jhagaD baiTha hun

aap fursat se kisi din mujhe samjhaiyega

main KHayalon mein bhaTak jata hun baiThe baiThe

bhej aahaT ka sandesa mujhe bulwaiyega

main ne zulmat mein guzare hain kai qarn so aap

raushni se jo main Dar jaun na ghabraiyega

main samajhta hun mujhe log samajhte hi nahin

main kisi roz na samjhun to samajh jaiyega

gah ho jata hun main apni ana ka qaidi

main na aaun to phir aa kar mujhe chhuDwaega

KHair-maqdam ko hai tayyar jahan jaiye aap

han palaTna ho to phir mere hi ho jaiyega

mujh se zid hai to phir us zid ko nibhane ke liye

main jo mar jaun to phir aap bhi mar jaiyega

jam-e-jam fikr ka rakhta hai nirale manzar

aap jo dekhte hain duniya ko dikhlaiyega

soch jab yaksan na ho qafila kis kaam ka hai

aap 'ahmad' kahin raste mein hi rah jaiyega