jada-e-dard ke haalat mere apne hain

jāda-e-dard ke hālāt mire apne haiñ

raah ke saare tilismāt mire apne haiñ

qufl go Daal gayā dast-e-tashaddud lab par

ham-navā mere ḳhayālāt mire apne haiñ

kaise ho radd-e-balā kyā ho tabāhī se gurez

vo jo haiñ bā.is-e-āfāt mire apne haiñ

der se mujh pe jo haiñ sang-zanī meñ masrūf

dekhtī huuñ to sabhī haat mire apne haiñ

na huā mujh ko mayassar kabhī apnā honā

kījiye kyā ki ye hālāt mire apne haiñ

jab kabhī tere ta.alluq kā tahaffuz paayā

zindagī ke vahī lamhāt mire apne haiñ

jin kī buniyād huī mere lahū se ta.amīr

ye gharauñde vo mahallāt mire apne haiñ

sabab-e-gumrahī sābit huā zo.af-e-idrāk

vo jo haa.il haiñ hijābāt mire apne haiñ

maiñ 'ayāñ' dard ke rishte se rahī ālamgīr

fikr ke saare maqāmāt mire apne haiñ

jada-e-dard ke haalat mere apne hain

rah ke sare tilismat mere apne hain

qufl go Dal gaya dast-e-tashaddud lab par

ham-nawa mere KHayalat mere apne hain

kaise ho radd-e-bala kya ho tabahi se gurez

wo jo hain bais-e-afat mere apne hain

der se mujh pe jo hain sang-zani mein masruf

dekhti hun to sabhi hat mere apne hain

na hua mujh ko mayassar kabhi apna hona

kijiye kya ki ye haalat mere apne hain

jab kabhi tere talluq ka tahaffuz paya

zindagi ke wahi lamhat mere apne hain

jin ki buniyaad hui mere lahu se tamir

ye gharaunde wo mahallat mere apne hain

sabab-e-gumrahi sabit hua zoaf-e-idrak

wo jo hail hain hijabaat mere apne hain

main 'ayan' dard ke rishte se rahi aalamgir

fikr ke sare maqamat mere apne hain