jada-e-shauq hai gul-posh to pur-Khaar bhi hai

jāda-e-shauq hai gul-posh to pur-ḳhār bhī hai

justujū hai tirī āsān to dushvār bhī hai

jazba-e-dil kī sadāqat kā ye kyā kam hai subūt

mere hoñToñ pe tirā naam sar-e-dār bhī hai

sāhib-e-zarf jo gardāne ga.e haiñ mai-nosh

sāqiyā dekh ki un meñ koī hushiyār bhī hai

sog shabbīr kā har saal manāne vaalo

tum ko kirdār-e-husainī se sarokār bhī hai

sāda-lauhoñ se kaho aaj vo mohtāt raheñ

vaqt ke haath meñ qānūn bhī talvār bhī hai

chain insāñ ko kisī tarah nahīñ aaj ki vo

'tālib'-e-zīst bhī hai ziist se bezār bhī hai

jada-e-shauq hai gul-posh to pur-KHar bhi hai

justuju hai teri aasan to dushwar bhi hai

jazba-e-dil ki sadaqat ka ye kya kam hai subut

mere honTon pe tera nam sar-e-dar bhi hai

sahib-e-zarf jo gardane gae hain mai-nosh

saqiya dekh ki un mein koi hushiyar bhi hai

sog shabbir ka har sal manane walo

tum ko kirdar-e-husaini se sarokar bhi hai

sada-lauhon se kaho aaj wo mohtat rahen

waqt ke hath mein qanun bhi talwar bhi hai

chain insan ko kisi tarah nahin aaj ki wo

'talib'-e-zist bhi hai zist se bezar bhi hai