jaDe mein kya maza ho wo to simaT rahe hon

jaaḌe meñ kyā maza ho vo to simaT rahe hoñ

aur khol kar razā.ī ham bhī lipaT rahe hoñ

ab aap kī damoñ meñ ham aa chuke haTo bhī

ḳhush aave pyāre kis ko jab dil hī kaT rahe hoñ

kyūñkar zabāñ se un kī apnā bachāv hove

zāt-o-sifāt sab ke jab vo ukaT rahe hoñ

aate the saath mere dekho to kyā hue vo

aisā na ho ki pīchhe rishte meñ kaT rahe hoñ

tab sair dekhe koī bāham laḌā.īyoñ ke

khīñche hoñ vo to teġhā aur ham bhī DaT rahe hoñ

kyā kar sakeñ divāne hāl-e-dil-e-pareshāñ

zulfoñ ke baal un ke jab aap laT rahe hoñ

aapas meñ rūThne kā andāz ho to ye ho

vo ham se phaT rahe hoñ ham un se phaT rahe hoñ

jī chāhtā hai ai dil ik aisī raat aave

matl.a ho saaf shahrā bādal bhī phaT rahe hoñ

sote hoñ chāñdnī meñ vo muñh lapeTe aur ham

shabnam kā vo dupaTTa paTThe ulaT rahe hoñ

panjam ġhazal ab 'inshā' andāz kī sunā dī

āġhosh meñ ma.ānī jis ke lipaT rahe hoñ

jaDe mein kya maza ho wo to simaT rahe hon

aur khol kar razai hum bhi lipaT rahe hon

ab aap ki damon mein hum aa chuke haTo bhi

KHush aawe pyare kis ko jab dil hi kaT rahe hon

kyunkar zaban se un ki apna bachaw howe

zat-o-sifat sab ke jab wo ukaT rahe hon

aate the sath mere dekho to kya hue wo

aisa na ho ki pichhe rishte mein kaT rahe hon

tab sair dekhe koi baham laDaiyon ke

khinche hon wo to tegha aur hum bhi DaT rahe hon

kya kar saken diwane haal-e-dil-e-pareshan

zulfon ke baal un ke jab aap laT rahe hon

aapas mein ruThne ka andaz ho to ye ho

wo hum se phaT rahe hon hum un se phaT rahe hon

ji chahta hai ai dil ek aisi raat aawe

matla ho saf shahra baadal bhi phaT rahe hon

sote hon chandni mein wo munh lapeTe aur hum

shabnam ka wo dupaTTa paTThe ulaT rahe hon

panjam ghazal ab 'insha' andaz ki suna di

aaghosh mein maani jis ke lipaT rahe hon