jae KHirad nahin hai ki farzana chahiye

jaa.e ḳhirad nahīñ hai ki farzāna chāhiye

hū kā maqām hai koī dīvāna chāhiye

hai is meñ qaid-e-shahr na vīrāna chāhiye

bahr-e-farāġh tab-e-faqīrāna chāhiye

gunjā.ish-e-tasavvur-e-yak-lafz bhī nahīñ

yaañ har kisī ke vāste afsāna chāhiye

yaañ har qadam hai mahshar-e-imkān-e-nau-ba-nau

yaañ har qadam pe sajda-e-shukrāna chāhiye

jab tak ki haiñ zamāne meñ ham se ḳharāb log

masjid kahīñ kahīñ koī mai-ḳhāna chāhiye

ma.alūm hai ḳhudā ko jo hālat diloñ kī hai

ai shaiḳh ham faqīroñ pe fatvā na chāhiye

rakhte haiñ 'anjum' aap jo auroñ ke vāste

apne liye bhī to vahī paimāna chāhiye

jae KHirad nahin hai ki farzana chahiye

hu ka maqam hai koi diwana chahiye

hai is mein qaid-e-shahr na virana chahiye

bahr-e-faragh tab-e-faqirana chahiye

gunjaish-e-tasawwur-e-yak-lafz bhi nahin

yan har kisi ke waste afsana chahiye

yan har qadam hai mahshar-e-imkan-e-nau-ba-nau

yan har qadam pe sajda-e-shukrana chahiye

jab tak ki hain zamane mein hum se KHarab log

masjid kahin kahin koi mai-KHana chahiye

malum hai KHuda ko jo haalat dilon ki hai

ai shaiKH hum faqiron pe fatwa na chahiye

rakhte hain 'anjum' aap jo auron ke waste

apne liye bhi to wahi paimana chahiye