jaen ghuD-dauD par ki khelen tash

jaa.eñ ghuḌ-dauḌ par ki kheleñ taash

'mīr'-jī rāz-e-ishq hogā faash

pattharoñ meñ lagā rahe haiñ joñk

chāñd meñ ḳhūn-e-garm kī hai talāsh

yuuñ jhagaḌte haiñ jhūTī qadroñ par

zan-e-fāhish pe jis tarah aubāsh

na.e andāz se hanūt huī

ab na bū degī zindagī kī laash

uḌ gayā bhaap ban ke dil kā lahū

ab zamīñ duur hai qarīb ākāsh

hue maflūj vo bhī jin ke liye

ek aalam thā bar-sar-e-parḳhāsh

lāla-e-koh ko dimāġh nahīñ

nashsha laatī hai muḳhtalif ḳhashḳhāsh

kaise bhūkoñ mareñge itne log

be-huda ahd-e-nau meñ fikr-e-qimāsh

haf-iqlīm ke ḳhazānoñ par

haath Dāleñge an-ginat qallāsh

ab na aayā hisār se bāhar

naqsh meñ ḳhud hī Dhal gayā naqqāsh

rashk-e-gul hoñ ki misl-e-nashtar hoñ

yahī nāḳhun 'nazar' meñ zaḳhm-tarāsh

jaen ghuD-dauD par ki khelen tash

'mir'-ji raaz-e-ishq hoga fash

pattharon mein laga rahe hain jonk

chand mein KHun-e-garm ki hai talash

yun jhagaDte hain jhuTi qadron par

zan-e-fahish pe jis tarah aubash

nae andaz se hanut hui

ab na bu degi zindagi ki lash

uD gaya bhap ban ke dil ka lahu

ab zamin dur hai qarib aakash

hue mafluj wo bhi jin ke liye

ek aalam tha bar-sar-e-parKHash

lala-e-koh ko dimagh nahin

nashsha lati hai muKHtalif KHashKHash

kaise bhukon marenge itne log

be-huda ahd-e-nau mein fikr-e-qimash

haf-iqlim ke KHazanon par

hath Dalenge an-ginat qallash

ab na aaya hisar se bahar

naqsh mein KHud hi Dhal gaya naqqash

rashk-e-gul hon ki misl-e-nashtar hon

yahi naKHun 'nazar' mein zaKHm-tarash