jaez hai har ek harba is waqt siyasat mein

jaa.ez hai har ik harba is vaqt siyāsat meñ

patthar kā bayāñ le lo shīshe kī adālat meñ

lafzoñ se judā ho kar ik lafz huā tanhā

farsūda ḳhayāloñ kī maqbūza-riyāsat meñ

niklā thā julūs apne tārīk muqaddar kā

ma.azūl tamaddun kī maflūj qayādat meñ

ifrīt adāvat kā har vaqt Darātā thā

ham log muqayyad the vahshat kī imārat meñ

chehre pe ayaañ us ke manzar thā palāsī kā

niklā thā vo azmat ke lashkar kī himāyat meñ

pal-bhar meñ jalāyā thā isyāñ ke pahāḌoñ ko

ye soz-e-nihāñ kaisā thā ashk-e-nadāmat meñ

ye daur-e-ḳhirad 'jāmī' jazboñ se huā aarī

har jism pighaltā hai saa.e kī rifāqat meñ

jaez hai har ek harba is waqt siyasat mein

patthar ka bayan le lo shishe ki adalat mein

lafzon se juda ho kar ek lafz hua tanha

farsuda KHayalon ki maqbuza-riyasat mein

nikla tha julus apne tarik muqaddar ka

mazul tamaddun ki mafluj qayaadat mein

ifrit adawat ka har waqt Daraata tha

hum log muqayyad the wahshat ki imarat mein

chehre pe ayan us ke manzar tha palasi ka

nikla tha wo azmat ke lashkar ki himayat mein

pal-bhar mein jalaya tha isyan ke pahaDon ko

ye soz-e-nihan kaisa tha ashk-e-nadamat mein

ye daur-e-KHirad 'jami' jazbon se hua aari

har jism pighalta hai sae ki rifaqat mein