jaga nasib kanp uThi zulmat-e-hayat

jaagā nasīb kaañp uThī zulmat-e-hayāt

jab haath meñ liyā hai mohabbat se tū ne haat

ghabrā.egā bahut dil-e-ġham-ghīñ tire baġhair

rahne de ye ḳhulūs ye chāhat ye iltifāt

barkhā kī sāñvlī sī sahar rang ruup meñ

shānoñ pe jhūmtī huī vo mālve kī raat

māthe pe sub.h-e-ilm kī pau phūTtī huī

āñkhoñ meñ jaise kheltī ho rūh-e-kā.enāt

dil meñ ghuTī ghuTī sī rahegī kahāñ talak

aa jaao kah duuñ kaan meñ chupke se ek baat

lau de uThā hai taar har ik thartharā ke aaj

kin uñgliyoñ ne chheḌ diyā barbat-e-hayāt

jaga nasib kanp uThi zulmat-e-hayat

jab hath mein liya hai mohabbat se tu ne hat

ghabraega bahut dil-e-gham-ghin tere baghair

rahne de ye KHulus ye chahat ye iltifat

barkha ki sanwli si sahar rang rup mein

shanon pe jhumti hui wo malwe ki raat

mathe pe subh-e-ilm ki pau phuTti hui

aankhon mein jaise khelti ho ruh-e-kaenat

dil mein ghuTi ghuTi si rahegi kahan talak

aa jao kah dun kan mein chupke se ek baat

lau de uTha hai tar har ek tharthara ke aaj

kin ungliyon ne chheD diya barbat-e-hayat