jage ki koi soe hum farz nibha aae

jaage ki koī so.e ham farz nibhā aa.e

ham raat kī galiyoñ maiñ āvāz lagā aa.e

ma.alūm nahīñ ham ko phūloñ meñ chhupā kyā hai

bātoñ se to zālim kī ḳhushbu-e-vafā aa.e

zaḳhmo pe koī marham rakkhe yā namak chhiḌke

ham dard kā afsāna duniyā ko sunā aa.e

uThtī chalī jaatī hai dīvār gunāhoñ kī

kah do ye samundar se sāhil pe chalā aa.e

andāz-e-nazar us kā pāgal na kahīñ kar de

jab us kī taraf dekhūñ āñkhoñ meñ nasha aa.e

yādoñ ke darīchoñ se bachpan kī galī jhoñke

'rāhī' mire āñgan meñ mamtā kī havā aa.e

jage ki koi soe hum farz nibha aae

hum raat ki galiyon main aawaz laga aae

malum nahin hum ko phulon mein chhupa kya hai

baaton se to zalim ki KHushbu-e-wafa aae

zaKHmo pe koi marham rakkhe ya namak chhiDke

hum dard ka afsana duniya ko suna aae

uThti chali jati hai diwar gunahon ki

kah do ye samundar se sahil pe chala aae

andaz-e-nazar us ka pagal na kahin kar de

jab us ki taraf dekhun aankhon mein nasha aae

yaadon ke darichon se bachpan ki gali jhonke

'rahi' mere aangan mein mamta ki hawa aae