jagta jita badan bhi wahm bhi saya bhi hun

jāgtā jiitā badan bhī vahm bhī saaya bhī huuñ

ik tarah mohkam haqīqat ik tarah dhokā bhī huuñ

ruup ik vo bhī hai merā ruup ik ye bhī mirā

terā maz.har huuñ ḳhud apnī zaat kā parda bhī huuñ

kal mujhe pāoge kyā kal tak to huuñ reg-e-ravāñ

dekh lo mujh ko isī lamhe ki ā.īna bhī huuñ

maiñ ki huuñ ab in siloñ ke sard sannāToñ meñ gum

toḌ kar dekho mujhe to mahshar-e-barpā bhī huuñ

tum ne sadiyoñ āzmāyā phir vahī mujh se umiid

lakka-e-abr-e-ravāñ huuñ maiñ kabhī Thahrā bhī huuñ

maiñ abad bhī huuñ azal bhī har zamāne kā huuñ ism

aane vaalī rut bhī huuñ biitā huā lamha bhī huuñ

kis jihat ab jā.ūñ terī samt yā apnī taraf

hādisa kuchh kam nahīñ terā bhī huuñ apnā bhī huuñ

jo bhī ab chāho samajh lo jo bhī ab kah lo 'bashīr'

sāmne maujūd huuñ jo kuchh bhī huuñ jaisā bhī huuñ

jagta jita badan bhi wahm bhi saya bhi hun

ek tarah mohkam haqiqat ek tarah dhoka bhi hun

rup ek wo bhi hai mera rup ek ye bhi mera

tera mazhar hun KHud apni zat ka parda bhi hun

kal mujhe paoge kya kal tak to hun reg-e-rawan

dekh lo mujh ko isi lamhe ki aaina bhi hun

main ki hun ab in silon ke sard sannaTon mein gum

toD kar dekho mujhe to mahshar-e-barpa bhi hun

tum ne sadiyon aazmaya phir wahi mujh se umid

lakka-e-abr-e-rawan hun main kabhi Thahra bhi hun

main abad bhi hun azal bhi har zamane ka hun ism

aane wali rut bhi hun bita hua lamha bhi hun

kis jihat ab jaun teri samt ya apni taraf

hadisa kuchh kam nahin tera bhi hun apna bhi hun

jo bhi ab chaho samajh lo jo bhi ab kah lo 'bashir'

samne maujud hun jo kuchh bhi hun jaisa bhi hun