jagte gham bhi nahin jhumte sae bhi nahin

jāgte ġham bhī nahīñ jhūmte saa.e bhī nahīñ

saath apne bhī nahīñ aur parā.e bhī nahīñ

sīna-e-sāz meñ vo giit sulag uTThe haiñ

pyaar ban kar jo lab-e-sāz pe aa.e bhī nahīñ

zindagānī to ḳharīdār-e-sitam hai lekin

tum ne bāzār salīboñ ke sajā.e bhī nahīñ

kuchh irāde mire gītoñ kī thakan haiñ ab bhī

kuchh fasāne tirī āñkhoñ ne sunā.e bhī nahīñ

dhuup sochoñ ke dar-o-bām tak aa pahuñchī hai

aur aise meñ tirī yaad ke saa.e bhī nahīñ

ārzūoñ ke umangoñ ke mazāroñ pe kahīñ

ġham-e-'ayyām ne do phuul chaḌhā.e bhī nahīñ

vaqt kī raah meñ anjān nazar aate haiñ

varna ye log kuchh itne to parā.e bhī nahīñ

duur ke des kī pariyoñ kā bharosa kyā thā

ham ne ḳhvāboñ ke na.e diip jalā.e bhī nahīñ

zindagānī ke hasīñ shahr meñ aa kar 'jāmī'

zindagānī se kahīñ haath milā.e bhī nahīñ

jagte gham bhi nahin jhumte sae bhi nahin

sath apne bhi nahin aur parae bhi nahin

sina-e-saz mein wo git sulag uTThe hain

pyar ban kar jo lab-e-saz pe aae bhi nahin

zindagani to KHaridar-e-sitam hai lekin

tum ne bazar salibon ke sajae bhi nahin

kuchh irade mere giton ki thakan hain ab bhi

kuchh fasane teri aankhon ne sunae bhi nahin

dhup sochon ke dar-o-baam tak aa pahunchi hai

aur aise mein teri yaad ke sae bhi nahin

aarzuon ke umangon ke mazaron pe kahin

gham-e-'ayyam ne do phul chaDhae bhi nahin

waqt ki rah mein anjaan nazar aate hain

warna ye log kuchh itne to parae bhi nahin

dur ke des ki pariyon ka bharosa kya tha

hum ne KHwabon ke nae dip jalae bhi nahin

zindagani ke hasin shahr mein aa kar 'jami'

zindagani se kahin hath milae bhi nahin