jagte rahte ho raaton ko barabar kis liye

jāgte rahte ho rātoñ ko barābar kis liye

kuchh na kuchh to baat hai sote ho din-bhar kis liye

tum se kyā dekhā nahīñ jaatā mirā dam toḌnā

jā rahe ho varna mere paas aa kar kis liye

kuchh na kuchh to ġhair se rishta tumhārā hai zarūr

roz aate jaate ho us ke makāñ par kis liye

ye sharārat hai ḳhudā mā'lūm yā iz.hār-e-‘ishq

dekhte ho merī jānib muskurā kar kis liye

aur kyā taqsīr hai merī mohabbat ke sivā

hai ḳhafā mujh se tū ai shoḳh-e-sitamgar kis liye

phir kisī ko daam meñ laane kī tayyārī hai kyā

kāTtā hai baaġh meñ sayyād chakkar kis liye

hazrat-e-'hājir' kisī kī justujū hai aap ko

māre-māre phir rahe haiñ aap dar-dar kis liye

jagte rahte ho raaton ko barabar kis liye

kuchh na kuchh to baat hai sote ho din-bhar kis liye

tum se kya dekha nahin jata mera dam toDna

ja rahe ho warna mere pas aa kar kis liye

kuchh na kuchh to ghair se rishta tumhaara hai zarur

roz aate jate ho us ke makan par kis liye

ye shararat hai KHuda ma'lum ya izhaar-e-‘ishq

dekhte ho meri jaanib muskura kar kis liye

aur kya taqsir hai meri mohabbat ke siwa

hai KHafa mujh se tu ai shoKH-e-sitamgar kis liye

phir kisi ko dam mein lane ki tayyari hai kya

kaTta hai bagh mein sayyaad chakkar kis liye

hazrat-e-'hajir' kisi ki justuju hai aap ko

mare-mare phir rahe hain aap dar-dar kis liye