جاگتے رہتے ہو راتوں کو برابر کس لیے

جاگتے رہتے ہو راتوں کو برابر کس لیے

کچھ نہ کچھ تو بات ہے سوتے ہو دن بھر کس لیے

تم سے کیا دیکھا نہیں جاتا مرا دم توڑنا

جا رہے ہو ورنہ میرے پاس آ کر کس لیے

کچھ نہ کچھ تو غیر سے رشتہ تمہارا ہے ضرور

روز آتے جاتے ہو اس کے مکاں پر کس لیے

یہ شرارت ہے خدا معلوم یا اظہار عشق

دیکھتے ہو میری جانب مسکرا کر کس لیے

اور کیا تقصیر ہے میری محبت کے سوا

ہے خفا مجھ سے تو اے شوخ ستم گر کس لیے

پھر کسی کو دام میں لانے کی تیاری ہے کیا

کاٹتا ہے باغ میں صیاد چکر کس لیے

حضرت ہاجرؔ کسی کی جستجو ہے آپ کو

مارے مارے پھر رہے ہیں آپ در در کس لیے