jagti aankhon ko KHwabon ki saza de jaega

jāgtī āñkhoñ ko ḳhvāboñ kī sazā de jā.egā

phir purānā dost koī dukh nayā de jā.egā

jaane kab TūTegā ye lafz o ma'ānī kā tilism

jaane kab vo gūñge lafzoñ ko sadā de jā.egā

būḌhī āñkhoñ ne sajāyā hai javāñ beTe kā ḳhvāb

kāñpte hāthoñ meñ ik ḳhat Dākiyā de jā.egā

raat din lipTā hai pairoñ se mire andhā safar

ajnabī ehsās manzil kā patā de jā.egā

muskurātī zindagī ke ḳhuun kā pyāsā uqaab

vaqt ke hāthoñ meñ zaḳhmī fāḳhta de jā.egā

jhuuT is se pahle to bachchoñ ke hoñToñ par na thā

bhuuk kā aaseb un ko aur kyā de jā.egā

raat ke āñgan meñ sūraj ke musāfir kā qayām

phuul se jismoñ ko zaḳhmoñ kī qabā de jā.egā

mere munsif faisla terā sar-e-taslīm ḳham

jo bhī kuchh hogā muqaddar kā likhā de jā.egā

phir dulhan banñe se pahle muflisī beva huī

phir amīr-e-shahr ḳhvāboñ ko chitā de jā.egā

jagti aankhon ko KHwabon ki saza de jaega

phir purana dost koi dukh naya de jaega

jaane kab TuTega ye lafz o ma'ani ka tilism

jaane kab wo gunge lafzon ko sada de jaega

buDhi aankhon ne sajaya hai jawan beTe ka KHwab

kanpte hathon mein ek KHat Dakiya de jaega

raat din lipTa hai pairon se mere andha safar

ajnabi ehsas manzil ka pata de jaega

muskuraati zindagi ke KHun ka pyasa uqab

waqt ke hathon mein zaKHmi faKHta de jaega

jhuT is se pahle to bachchon ke honTon par na tha

bhuk ka aaseb un ko aur kya de jaega

raat ke aangan mein suraj ke musafir ka qayam

phul se jismon ko zaKHmon ki qaba de jaega

mere munsif faisla tera sar-e-taslim KHam

jo bhi kuchh hoga muqaddar ka likha de jaega

phir dulhan banne se pahle muflisi bewa hui

phir amir-e-shahr KHwabon ko chita de jaega