jagti aankhon mein tha ambar khula

jāgtī āñkhoñ meñ thā ambar khulā

so ga.e to ḳhvāb meñ ik dar khulā

naam jab dil ne pukārā yā-alī

to sabhī par ma.anī-e-lashkar khulā

be-ḳhayālī meñ chhuā us ne mujhe

husn kā ik dar mire andar khulā

khīñch lūñgā dhuup kī tasvīr maiñ

rah gayā ghar meñ añdherā gar khulā

zindagī meñ rang bharne hoñ agar

rakkho apne sāmne manzar khulā

ḳhvāhisheñ lene lagīñ añgḌā.iyāñ

jab tirā saaya darīche par khulā

saath rah kar bhī rahe ham ajnabī

ek muddat baad ye ham par khulā

ḳhūbsūrat phuul haiñ is peḌ ke

yā koī baiThā hai bāl-o-par khulā

jagti aankhon mein tha ambar khula

so gae to KHwab mein ek dar khula

nam jab dil ne pukara ya-ali

to sabhi par mani-e-lashkar khula

be-KHayali mein chhua us ne mujhe

husn ka ek dar mere andar khula

khinch lunga dhup ki taswir main

rah gaya ghar mein andhera gar khula

zindagi mein rang bharne hon agar

rakkho apne samne manzar khula

KHwahishen lene lagin angDaiyan

jab tera saya dariche par khula

sath rah kar bhi rahe hum ajnabi

ek muddat baad ye hum par khula

KHubsurat phul hain is peD ke

ya koi baiTha hai baal-o-par khula