jagti haqiqat tak rasta hai KHwabon ka

jāgtī haqīqat tak rāsta hai ḳhvāboñ kā

darmiyāñ mire un ke fāsla hai ḳhvāboñ kā

ek shab ke TukḌoñ ke naam muḳhtalif rakhe

jism-o-rūh kā bandhan silsila hai ḳhvāboñ kā

dekheñ is kashākash kā iḳhtitām ho kab tak

jāgne kī ḳhvāhish hai hausla hai ḳhvāboñ kā

apnī apnī ta.abīreñ DhūñDhtā hai har chehra

chehra chehra paḌh liije tazkira hai ḳhvāboñ kā

nashshe kā ye aalam hai sach hī sach lage sab kuchh

zindagī kī sahbā hai mai-kada hai ḳhvāboñ kā

gard-e-rāh kī sūrat saañs saañs hai ai 'nūr'

mīr-e-kārvāñ maiñ huuñ qāfila hai ḳhvāboñ kā

jagti haqiqat tak rasta hai KHwabon ka

darmiyan mere un ke fasla hai KHwabon ka

ek shab ke TukDon ke nam muKHtalif rakhe

jism-o-ruh ka bandhan silsila hai KHwabon ka

dekhen is kashakash ka iKHtitam ho kab tak

jagne ki KHwahish hai hausla hai KHwabon ka

apni apni tabiren DhunDhta hai har chehra

chehra chehra paDh lije tazkira hai KHwabon ka

nashshe ka ye aalam hai sach hi sach lage sab kuchh

zindagi ki sahba hai mai-kada hai KHwabon ka

gard-e-rah ki surat sans sans hai ai 'nur'

mir-e-karwan main hun qafila hai KHwabon ka