جام جم مانگے نہ جمشید کا ساغر مانگے

جام جم مانگے نہ جمشید کا ساغر مانگے

لطف کی ایک نظر یہ دل مضطر مانگے

شرط ہے رنج و تعب سختیٔ دوراں پہلے

مانگنا ہو تو کوئی دار پہ چڑھ کر مانگے

راس آیا نہیں یہ خانۂ گلشن اب تک

زندگی میرے لیے اور کوئی گھر مانگے

لذت درد سے سیری نہیں ہوتی اب تک

درد کچھ اور سوا یہ دل مضطر مانگے

فیض بخشا ہے کسی اور ہی ہستی نے تجھے

روشنی تجھ سے کوئی کیا شہ خاور مانگے

شوکت جاہ و حشم خاک اجل کے ہاتھوں

دہر میں پھر کوئی کیوں اوج سکندر مانگے

ہائے اس راہیئ پر غم کی شکستہ پائی

دامن کوہ میں جو بیٹھ کے پتھر مانگے

کون سمجھے تری نیرنگیٔ قدرت یارب

صاحب تاج ہے کوئی کوئی در در مانگے