jam-e-jam mange na jamshed ka saghar mange

jām-e-jam māñge na jamshed kā sāġhar māñge

lutf kī ek nazar ye dil-e-muztar māñge

shart hai ranj-o-ta’ab saḳhtī-e-daurāñ pahle

māñgnā ho to koī daar pe chaḌh kar māñge

raas aaya nahīñ ye ḳhāna-e-gulshan ab tak

zindagī mere liye aur koī ghar māñge

lazzat-e-dard se serī nahīñ hotī ab tak

dard kuchh aur sivā ye dil-e-muztar māñge

faiz baḳhshā hai kisī aur hī hastī ne tujhe

raushnī tujh se koī kyā shah-e-ḳhāvar māñge

shaukat-e-jāh-o-hasham ḳhaak ajal ke hāthoñ

dahr meñ phir koī kyoñ auj-e-sikandar māñge

haa.e us rāhī-e-pur-ġham kī shikasta-pā.ī

dāman-e-koh meñ jo baiTh ke patthar māñge

kaun samjhe tirī nairangī-e-qudrat yārab

sāhab-e-tāj hai koī koī dar-dar māñge

jam-e-jam mange na jamshed ka saghar mange

lutf ki ek nazar ye dil-e-muztar mange

shart hai ranj-o-ta’ab saKHti-e-dauran pahle

mangna ho to koi dar pe chaDh kar mange

ras aaya nahin ye KHana-e-gulshan ab tak

zindagi mere liye aur koi ghar mange

lazzat-e-dard se seri nahin hoti ab tak

dard kuchh aur siwa ye dil-e-muztar mange

faiz baKHsha hai kisi aur hi hasti ne tujhe

raushni tujh se koi kya shah-e-KHawar mange

shaukat-e-jah-o-hasham KHak ajal ke hathon

dahr mein phir koi kyon auj-e-sikandar mange

hae us rahi-e-pur-gham ki shikasta-pai

daman-e-koh mein jo baiTh ke patthar mange

kaun samjhe teri nairangi-e-qudrat yarab

sahab-e-taj hai koi koi dar-dar mange