jam tha KHum tha subu tha majma-e-ahbab tha

jaam thā ḳhum thā subū thā majma-e-ahbāb thā

shaiḳh kā in sab meñ chehra kis qadar shādāb thā

maiñ ne dekhā raat merī god meñ mahtāb thā

aap hī ta.abīr us kī deñ ye kaisā ḳhvāb thā

qais dīvāna tirā ai lailī-e-mahmil-nashīñ

terī sūrat dekhne ko kis qadar betāb thā

vo qulī thā yā thā koī kaaTh kā ullū murīd

piiTh par laade hue jo shaiḳh kā asbāb thā

us ne ye achchhā kiyā jo aqd hī paḌhvā liyā

dil murīdan ke liye jab sūrat-e-sīmāb thā

kyuuñ na dāḌhī apnī kartā jumbish-e-razor kī bheñT

ḳhanda-zan is shakl par jab halqa-e-ahbāb thā

raat bhar maiñ ne sañvārī zulf-e-lailā-e-ġhazal

sher kī aamad thī 'hāshim' yā koī sailāb thā

jam tha KHum tha subu tha majma-e-ahbab tha

shaiKH ka in sab mein chehra kis qadar shadab tha

main ne dekha raat meri god mein mahtab tha

aap hi tabir us ki den ye kaisa KHwab tha

qais diwana tera ai laili-e-mahmil-nashin

teri surat dekhne ko kis qadar betab tha

wo quli tha ya tha koi kaTh ka ullu murid

piTh par lade hue jo shaiKH ka asbab tha

us ne ye achchha kiya jo aqd hi paDhwa liya

dil muridan ke liye jab surat-e-simab tha

kyun na daDhi apni karta jumbish-e-razor ki bhenT

KHanda-zan is shakl par jab halqa-e-ahbab tha

raat bhar main ne sanwari zulf-e-laila-e-ghazal

sher ki aamad thi 'hashim' ya koi sailab tha