جان آتی ہے تیرے آنے سے

جان آتی ہے تیرے آنے سے

ڈوبتا جی ہے تیرے جانے سے

مشکلیں ٹلتیں تو نہیں لیکن

دل بہلتا ہے مسکرانے سے

دیکھی جس جس نے بھی جھلک تیری

بے خبر ہو گیا زمانے سے

کربلا میں عجیب منظر تھا

روشنی تھی دیا بجھانے سے

جسم میں قید روح پوچھے ہے

کب رہائی ہو قید خانے سے

بانٹ دیتا ہوں میں سبھی خوشیاں

غم نہیں دیتا میں خزانے سے

مر گیا ہے جو ہجر میں تیرے

کیا مرے گا وہ جان جانے سے

یار اک بات تو بتا آخر

کیا ملے گا یہ دل دکھانے سے

میرے جذبات مر چکے ہیں سو اب

تم دکھی ہو گے آزمانے سے

فرش کو عرش جو بناتے ہیں

عشق ہے مجھ کو اس گھرانے سے

میں نے اس طرح جی اجاڑا ہے

اب نہیں بستا یہ بسانے سے

ہو گئی ہے جدید یہ دنیا

اور ہم لوگ ہیں پرانے سے

میں نے کوشش بہت کی ہے لیکن

یاد مٹتی نہیں مٹانے سے

ہم نے بیمار ہو کے بھی دیکھا

تم نہ آئے کبھی بہانے سے

رات کٹتی ہے رتجگوں کی اب

ہجر کے گیت گنگنانے سے