jaan aati hai tere aane se

jaan aatī hai tere aane se

Dūbtā jī hai tere jaane se

mushkileñ Taltīñ to nahīñ lekin

dil bahaltā hai muskurāne se

dekhī jis jis ne bhī jhalak terī

be-ḳhabar ho gayā zamāne se

karbalā meñ 'ajīb manzar thā

raushnī thī diyā bujhāne se

jism meñ qaid ruuh pūchhe hai

kab rihā.ī ho qaid-ḳhāne se

baañT detā huuñ maiñ sabhī ḳhushiyāñ

ġham nahīñ detā maiñ ḳhazāne se

mar gayā hai jo hijr meñ tere

kyā maregā vo jaan jaane se

yaar ik baat to batā āḳhir

kyā milegā ye dil dikhāne se

mere jazbāt mar chuke haiñ so ab

tum dukhī hoge āzmāne se

farsh ko 'arsh jo banāte haiñ

'ishq hai mujh ko us gharāne se

maiñ ne is tarh jī ujāḌā hai

ab nahīñ bastā ye basāne se

ho ga.ī hai jadīd ye duniyā

aur ham log haiñ purāne se

maiñ ne koshish bahut kī hai lekin

yaad miTtī nahīñ miTāne se

ham ne bīmār ho ke bhī dekhā

tum na aa.e kabhī bahāne se

raat kaTtī hai ratjagoñ kī ab

hijr ke giit gungunāne se

jaan aati hai tere aane se

Dubta ji hai tere jaane se

mushkilen Taltin to nahin lekin

dil bahalta hai muskurane se

dekhi jis jis ne bhi jhalak teri

be-KHabar ho gaya zamane se

karbala mein 'ajib manzar tha

raushni thi diya bujhane se

jism mein qaid ruh puchhe hai

kab rihai ho qaid-KHane se

banT deta hun main sabhi KHushiyan

gham nahin deta main KHazane se

mar gaya hai jo hijr mein tere

kya marega wo jaan jaane se

yar ek baat to bata aaKHir

kya milega ye dil dikhane se

mere jazbaat mar chuke hain so ab

tum dukhi hoge aazmane se

farsh ko 'arsh jo banate hain

'ishq hai mujh ko us gharane se

main ne is tarh ji ujaDa hai

ab nahin basta ye basane se

ho gai hai jadid ye duniya

aur hum log hain purane se

main ne koshish bahut ki hai lekin

yaad miTti nahin miTane se

hum ne bimar ho ke bhi dekha

tum na aae kabhi bahane se

raat kaTti hai ratjagon ki ab

hijr ke git gungunane se