jaan-ba-lab waise hi the aur hamein mar chala

jāñ-ba-lab vaise hī the aur hameñ maar chalā

dhuup ke saath kahāñ sāya-e-dīvār chalā

bāz-gashtoñ ke ta.āqub se pareshāñ ho kar

maiñ bhī āvāz ke jañgal meñ dhuāñ-dhār chalā

maiñ ne ham zāviya qaabū nahīñ paayā ab tak

ai tamannā mire siine meñ na talvār chalā

ye safar vo hai jahāñ saañs ke par jalte haiñ

tujh ko zid hai to phir ai hasti-e-bekār chal aa

chāk-dāmānī se pahle hī bikhar jā.eñge

yuuñ shagūfoñ meñ agar tazkira-e-ḳhār chalā

gir paḌī ret kī dīvār to māyūsī meñ

gard-e-vahshat na uḌā ḳhuun kī bauchhār chalā

jaan-ba-lab waise hi the aur hamein mar chala

dhup ke sath kahan saya-e-diwar chala

baz-gashton ke taaqub se pareshan ho kar

main bhi aawaz ke jangal mein dhuan-dhaar chala

main ne hum zawiya qabu nahin paya ab tak

ai tamanna mere sine mein na talwar chala

ye safar wo hai jahan sans ke par jalte hain

tujh ko zid hai to phir ai hasti-e-bekar chal aa

chaak-damani se pahle hi bikhar jaenge

yun shagufon mein agar tazkira-e-KHar chala

gir paDi ret ki diwar to mayusi mein

gard-e-wahshat na uDa KHun ki bauchhaar chala