jaan de di rahraw-e-manzil ne manzil ke qarib

jaan de dī rahrav-e-manzil ne manzil ke qarīb

hausle tūfāñ ke nikle bhī to sāhil ke qarīb

vo nazar bahkī huī phirtī hai kyuuñ dil ke qarīb

us kī manzil bhī hai shāyad merī manzil ke qarīb

azm-e-ġharqābī hai to minnat-kash-e-tūfāñ na ban

kashtiyāñ lākhoñ huī haiñ ġharq sāhil ke qarīb

rahrav-e-manzil ne ban kar markaz-e-yās-o-umīd

manzileñ lākhoñ banā liiñ apnī manzil ke qarīb

Dūbne vaale ko tinke kā sahārā chāhiye

mauj bhī sāhil nazar aatī hai sāhil ke qarīb

jaan de kar mutma.in hai rahrav-e-himmat-shikan

dūrī-e-manzil ne pahuñchāyā hai manzil ke qarīb

dīdanī hai us kī hasrat us kā armāñ us kā shauq

jis kī kashtī Duub jaa.e aa ke sāhil ke qarīb

Dagmagā jaate haiñ pā-e-shauq aksar ai 'ra.īs'

manzileñ aisī bhī aa jaatī haiñ manzil ke qarīb

jaan de di rahraw-e-manzil ne manzil ke qarib

hausle tufan ke nikle bhi to sahil ke qarib

wo nazar bahki hui phirti hai kyun dil ke qarib

us ki manzil bhi hai shayad meri manzil ke qarib

azm-e-gharqabi hai to minnat-kash-e-tufan na ban

kashtiyan lakhon hui hain gharq sahil ke qarib

rahraw-e-manzil ne ban kar markaz-e-yas-o-umid

manzilen lakhon bana lin apni manzil ke qarib

Dubne wale ko tinke ka sahaara chahiye

mauj bhi sahil nazar aati hai sahil ke qarib

jaan de kar mutmain hai rahraw-e-himmat-shikan

duri-e-manzil ne pahunchaya hai manzil ke qarib

didani hai us ki hasrat us ka arman us ka shauq

jis ki kashti Dub jae aa ke sahil ke qarib

Dagmaga jate hain pa-e-shauq aksar ai 'rais'

manzilen aisi bhi aa jati hain manzil ke qarib