jaan-e-man aap to bezar hue baiThe hain

jān-e-man aap to bezār hue baiThe haiñ

kyā masīhā mire bīmār hue baiThe haiñ

is adā par mirā dil kyā mirī jaañ bhī hāzir

aap yuuñ khiñch ke jo talvār hue baiThe haiñ

dushman-e-jāñ the to karte the ta.āqub lekin

jān-e-jāñ ho ke to be-kār hue baiThe haiñ

shaam kī chaa.e kā va.ada vo udhar bhuul ga.e

ham idhar sub.h se tayyār hue baiThe haiñ

hāsil-e-ishq hai kyā husn-e-nazar se aage

ḳhush-gumāñ tālib-e-dīdār hue baiThe haiñ

phir zamāne kā hai isrār chalo saath chalo

aur ham raah meñ dīvār hue baiThe haiñ

un kī nazroñ kā ishāra hai nizām-e-hastī

apnī qudrat kā jo shahkār hue baiThe haiñ

zindagī ḳhvāb magar ḳhvāb-e-haqīqat-nigarāñ

ham ye kis niiñd meñ bedār hue baiThe haiñ

dād-o-tahsīn kī parvā nahīñ ham ko 'pinhāñ'

ham ġhazal kah ke hī sarshār hue baiThe haiñ

jaan-e-man aap to bezar hue baiThe hain

kya masiha mere bimar hue baiThe hain

is ada par mera dil kya meri jaan bhi hazir

aap yun khinch ke jo talwar hue baiThe hain

dushman-e-jaan the to karte the taaqub lekin

jaan-e-jaan ho ke to be-kar hue baiThe hain

sham ki chae ka wada wo udhar bhul gae

hum idhar subh se tayyar hue baiThe hain

hasil-e-ishq hai kya husn-e-nazar se aage

KHush-guman talib-e-didar hue baiThe hain

phir zamane ka hai israr chalo sath chalo

aur hum rah mein diwar hue baiThe hain

un ki nazron ka ishaara hai nizam-e-hasti

apni qudrat ka jo shahkar hue baiThe hain

zindagi KHwab magar KHwab-e-haqiqat-nigaran

hum ye kis nind mein bedar hue baiThe hain

dad-o-tahsin ki parwa nahin hum ko 'pinhan'

hum ghazal kah ke hi sarshaar hue baiThe hain