jaan ek zarbat-e-shamshir-e-do-dam aur sahi

jaan ik zarbat-e-shamshīr-e-do-dam aur sahī

tan-e-sad-chāk pe duniyā ke sitam aur sahī

tāqat-e-jumbish-e-yak-gām nahīñ hai lekin

tere kūche kī taraf ek qadam aur sahī

haiñ mire dil ko bahut dard mayassar phir bhī

aap kī yaad kā ik dast-e-karam aur sahī

saañs baaqī hai so chaltā hī chalā jā.ūñgā

jū-e-ġham aur sahī zor-e-sitam aur sahī

phir huī jaatī hai paidā havas-e-sajda-e-shauq

dil ke mandir meñ koī taaza sanam aur sahī

koī naqqād na Thahrā mire aage 'kāzim'

mudda'ā yuuñ hai ki ik shaiḳh-e-haram aur sahī

jaan ek zarbat-e-shamshir-e-do-dam aur sahi

tan-e-sad-chaak pe duniya ke sitam aur sahi

taqat-e-jumbish-e-yak-gam nahin hai lekin

tere kuche ki taraf ek qadam aur sahi

hain mere dil ko bahut dard mayassar phir bhi

aap ki yaad ka ek dast-e-karam aur sahi

sans baqi hai so chalta hi chala jaunga

ju-e-gham aur sahi zor-e-sitam aur sahi

phir hui jati hai paida hawas-e-sajda-e-shauq

dil ke mandir mein koi taza sanam aur sahi

koi naqqad na Thahra mere aage 'kazim'

mudda'a yun hai ki ek shaiKH-e-haram aur sahi