jaan-kani ka pasina hai aur lamha lamha Tapakta hua waqt hai

jāñ-kanī kā pasīna hai aur lamha lamha Tapaktā huā vaqt hai

maut hai sach kī hurmat kā pahlā suḳhan dūsrā vaqt hai

zuhl ke kāsa-e-nahs meñ shahr-e-zulmāt ḳhāmosh hai

ek andhā magar chīḳhtā hai ki logo burā vaqt hai

apne mushkī ko mahmez de kar zarā ik nazar dekh luuñ

kitne nuurī baras kī masāfat pe Thahrā huā vaqt hai

ibn-e-ādam kā virsa hai paiġhambarī vaqt aur imtihāñ

hausle kā 'asā ab na TuuTe ki aage kaḌā vaqt hai

ḳhuuñ meñ tar lashkarī zindagī kī fasīloñ pe sote haiñ kyoñ

raat din mil rahe haiñ yahāñ is ghaḌī jhuTpuTā vaqt hai

ham jo zinda the masrūf the har nafas kār-e-bekār meñ

aur ab mar chuke haiñ to lagtā hai jaise baḌā vaqt hai

koh-e-āvārgī tere dāman meñ kab se huuñ maiñ ḳhema-zan

raat Dhaltī nahīñ din guzartā nahīñ jaane kyā vaqt hai

ek muddat huī pyaar ke shahr meñ us se bichhḌe hue

do ghaḌī ke liye gar mile vo kahīñ pūchhnā vaqt hai

jaan-kani ka pasina hai aur lamha lamha Tapakta hua waqt hai

maut hai sach ki hurmat ka pahla suKHan dusra waqt hai

zuhl ke kasa-e-nahs mein shahr-e-zulmat KHamosh hai

ek andha magar chiKHta hai ki logo bura waqt hai

apne mushki ko mahmez de kar zara ek nazar dekh lun

kitne nuri baras ki masafat pe Thahra hua waqt hai

ibn-e-adam ka wirsa hai paighambari waqt aur imtihan

hausle ka 'asa ab na TuTe ki aage kaDa waqt hai

KHun mein tar lashkari zindagi ki fasilon pe sote hain kyon

raat din mil rahe hain yahan is ghaDi jhuTpuTa waqt hai

hum jo zinda the masruf the har nafas kar-e-bekar mein

aur ab mar chuke hain to lagta hai jaise baDa waqt hai

koh-e-awargi tere daman mein kab se hun main KHema-zan

raat Dhalti nahin din guzarta nahin jaane kya waqt hai

ek muddat hui pyar ke shahr mein us se bichhDe hue

do ghaDi ke liye gar mile wo kahin puchhna waqt hai