jaan kar humne jaan-e-wafa aapko

jaan kar ham ne jān-e-vafā aap ko

ik nazar hī meñ dil de diyā aap ko

aaj yuuñ dil ne dī hai sadā aap ko

jaise apnā banā hī liyā aap ko

dekh kar aa.ina aap sharmā ga.e

dekhtā rah gayā aa.ina aap ko

aap aur mai-kada vā.iz-e-mohtaram

ham samajhte rahe pārsā aap ko

jāñ-ba-lab thā magar jī uThā dekh kar

ab masīhā kahūñ yā ḳhudā aap ko

chiir kar siina kaise dikhā.ūñ bhalā

dil kā shīrāza bikhrā huā aap ko

kaun kartā bhalā aap kā sāmnā

kis meñ jur.at thī jo dekhtā aap ko

is qadar sho.alagī 'dard' ash.ār meñ

log kahte haiñ ātish-navā aap ko

jaan kar hum ne jaan-e-wafa aap ko

ek nazar hi mein dil de diya aap ko

aaj yun dil ne di hai sada aap ko

jaise apna bana hi liya aap ko

dekh kar aaina aap sharma gae

dekhta rah gaya aaina aap ko

aap aur mai-kada waiz-e-mohtaram

hum samajhte rahe parsa aap ko

jaan-ba-lab tha magar ji uTha dekh kar

ab masiha kahun ya KHuda aap ko

chir kar sina kaise dikhaun bhala

dil ka shiraaza bikhra hua aap ko

kaun karta bhala aap ka samna

kis mein jurat thi jo dekhta aap ko

is qadar shoalagi 'dard' ashaar mein

log kahte hain aatish-nawa aap ko