jaan o dil sin main giraftar hun kin ka un ka

jaan o dil siiñ maiñ giraftār huuñ kin kā un kā

banda-e-be-zar-o-dīnār huuñ kin kā un kā

sabr ke baaġh ke manDve se jhaḌā huuñ jiyūñ phuul

ab to lāchār gale haar huuñ kin kā un kā

hauz-e-kausar kī nahīñ chāh-e-zanaḳhdāñ kī qasam

tishna-e-sharbat-e-dīdār huuñ kin kā un kā

lab-o-ruḳhsār ke gul-qand siiñ lāzim hai ilaaj

dil ke āzār siiñ bīmār huuñ kin kā un kā

muddateñ huiiñ ki huā ḳhāna-e-zanjīr ḳharāb

basta-e-zulf-e-girah-dār huuñ kin kā un kā

tishna-e-marg kuuñ hai āb-e-surāhī dam-e-teġh

bismil-e-abrū-e-ḳhamdār huuñ kin kā un kā

nāhaq is sañg-dilī siiñ mujhe dete haiñ shikast

maiñ to ā.īna-e-sarkār huuñ kin kā un kā

gulshan-e-vasl meñ rahtā huuñ ġhazal-ḳhvān-e-firāq

andalīb-e-gul-e-ruḳhsār huuñ kin kā un kā

maiñ kahā rahm patañgoñ pe kar ai jān-e-'sirāj'

tab kahā sham-e-shab-tār huuñ kin kā un kā

jaan o dil sin main giraftar hun kin ka un ka

banda-e-be-zar-o-dinar hun kin ka un ka

sabr ke bagh ke manDwe se jhaDa hun jiyun phul

ab to lachaar gale haar hun kin ka un ka

hauz-e-kausar ki nahin chah-e-zanaKHdan ki qasam

tishna-e-sharbat-e-didar hun kin ka un ka

lab-o-ruKHsar ke gul-qand sin lazim hai ilaj

dil ke aazar sin bimar hun kin ka un ka

muddaten huin ki hua KHana-e-zanjir KHarab

basta-e-zulf-e-girah-dar hun kin ka un ka

tishna-e-marg kun hai aab-e-surahi dam-e-tegh

bismil-e-abru-e-KHamdar hun kin ka un ka

nahaq is sang-dili sin mujhe dete hain shikast

main to aaina-e-sarkar hun kin ka un ka

gulshan-e-wasl mein rahta hun ghazal-KHwan-e-firaq

andalib-e-gul-e-ruKHsar hun kin ka un ka

main kaha rahm patangon pe kar ai jaan-e-'siraj'

tab kaha sham-e-shab-tar hun kin ka un ka