jaan ya dil nazr karna chahiye

jaan yā dil nazr karnā chāhiye

kuchh na kuchh us but ko puujā chāhiye

dil-shigāfī chāhiye misl-e-qalam

zaḳhm siine kā na siinā chāhiye

kaaT kar sar paar beḌā kījiye

teġh ke ghāToñ utārā chāhiye

maiñ fidā huuñ gar tumheñ bāvar na ho

aazmā dekho use kyā chāhiye

kashtī-e-mai kā lab-e-jū daur ho

khelnā mastoñ nivāḌā chāhiye

mast-e-sar-josh-e-shahādat kījiye

misl-e-mai talvār khīñchā chāhiye

vasl meñ bekār hai muñh par naqāb

sharm kā āñkhoñ pe pardā chāhiye

koī ho pāmāl misl-e-naqsh-e-pā

apne sar par ḳhaak uḌānā chāhiye

vo jo samajhiye na samjhe jī meñ hai

apne hī par dil se samjhā chāhiye

sab bure aġhyār hoñ kuchh ġham nahīñ

vo hasīñ bizzāt achchhā chāhiye

aañkh kā parda agar manzūr hai

chilmaneñ mizhgāñ kī chhoḌā chāhiye

kyā tilism-e-husn-o-ishq ai 'shād' hai

ye kisī kāmil se pūchhā chāhiye

jaan ya dil nazr karna chahiye

kuchh na kuchh us but ko puja chahiye

dil-shigafi chahiye misl-e-qalam

zaKHm sine ka na sina chahiye

kaT kar sar par beDa kijiye

tegh ke ghaTon utara chahiye

main fida hun gar tumhein bawar na ho

aazma dekho use kya chahiye

kashti-e-mai ka lab-e-ju daur ho

khelna maston niwaDa chahiye

mast-e-sar-josh-e-shahadat kijiye

misl-e-mai talwar khincha chahiye

wasl mein bekar hai munh par naqab

sharm ka aankhon pe parda chahiye

koi ho pamal misl-e-naqsh-e-pa

apne sar par KHak uDana chahiye

wo jo samajhiye na samjhe ji mein hai

apne hi par dil se samjha chahiye

sab bure aghyar hon kuchh gham nahin

wo hasin bizzat achchha chahiye

aankh ka parda agar manzur hai

chilmanen mizhgan ki chhoDa chahiye

kya tilism-e-husn-o-ishq ai 'shad' hai

ye kisi kaamil se puchha chahiye