jaana tha jo nasib mein saman to gaya

jaanā thā jo nasīb meñ sāmān to gayā

lekin amīr-e-shahr kā ehsān to gayā

samjhegā kaun barg-o-shajar kī navā-e-shauq

is dahr-e-be-sabāt se luqmān to gayā

hai aaj ghar meñ phir se tahī-dāmanī kā saath

kal tak jo thā muqīm vo mehmān to gayā

qā.em-kunāñ raho kī karo nauha-ḳhvāniyāñ

gulshan se ḳhār-o-gul kā nigahbān to gayā

baaqī hai sirf ahd-e-guzishta kī bāzgasht

yaaro anā-parast musalmān to gayā

ab tak 'inān-e-shāh-jahānī kā zo'm hai

kab kā 'inān-e-shāhī kā sāmān to gayā

dil mutma.in hai sub.h-e-muqaddas ke nuur se

kal raat jo uThā thā vo tūfān to gayā

faujeñ kareñgī ḳhud hī muqaddar kā faisla

talvār apnī pheñk ke sultān to gayā

jaana tha jo nasib mein saman to gaya

lekin amir-e-shahr ka ehsan to gaya

samjhega kaun barg-o-shajar ki nawa-e-shauq

is dahr-e-be-sabaat se luqman to gaya

hai aaj ghar mein phir se tahi-damani ka sath

kal tak jo tha muqim wo mehman to gaya

qaem-kunan raho ki karo nauha-KHwaniyan

gulshan se KHar-o-gul ka nigahban to gaya

baqi hai sirf ahd-e-guzishta ki bazgasht

yaro ana-parast musalman to gaya

ab tak 'inan-e-shah-jahani ka zo'm hai

kab ka 'inan-e-shahi ka saman to gaya

dil mutmain hai subh-e-muqaddas ke nur se

kal raat jo uTha tha wo tufan to gaya

faujen karengi KHud hi muqaddar ka faisla

talwar apni phenk ke sultan to gaya