jaana to bahut dur hai mahtab se aage

jaanā to bahut duur hai mahtāb se aage

baḌhte hī nahīñ paañv tire ḳhvāb se aage

kuchh aur hasīñ moḌ the rūdād-e-safar meñ

likkhā na magar kuchh bhī tire baab se aage

tahzīb kī zanjīr se uljhā rahā maiñ bhī

tū bhī na baḌhā jism ke ādāb se aage

motī ke ḳhazāne bhī tah-e-āb chhupe the

niklā na koī ḳhatra-e-girdāb se aage

dekho to kabhī dasht bhī ābād hai kaisā

niklo to zarā ḳhitta-e-shādāb se aage

bichhḌā to nahīñ koī tumhārā bhī safar meñ

kyuuñ bhāge chale jaate ho betāb se aage

duniyā kā chalan dekh ke lagtā to yahī hai

ab kuchh bhī nahīñ ālam-e-asbāb se aage

jaana to bahut dur hai mahtab se aage

baDhte hi nahin panw tere KHwab se aage

kuchh aur hasin moD the rudad-e-safar mein

likkha na magar kuchh bhi tere bab se aage

tahzib ki zanjir se uljha raha main bhi

tu bhi na baDha jism ke aadab se aage

moti ke KHazane bhi tah-e-ab chhupe the

nikla na koi KHatra-e-girdab se aage

dekho to kabhi dasht bhi aabaad hai kaisa

niklo to zara KHitta-e-shadab se aage

bichhDa to nahin koi tumhaara bhi safar mein

kyun bhage chale jate ho betab se aage

duniya ka chalan dekh ke lagta to yahi hai

ab kuchh bhi nahin aalam-e-asbab se aage