jaanch-parakh kar dekh chuki tu har munh-bole bhai ko

jāñch-parakh kar dekh chukī tū har muñh-bole bhaa.ī ko

kahne de ab koī sachchī baat 'qatīl-shifā.ī' ko

kar diyā bilkul apne jaisā mujh ko andhe cupid ne

apnī shohrat jaan rahā huuñ maiñ apnī rusvā.ī ko

shohrat chāhe kaisī bhī ho log tavajjoh dete haiñ

laakh hasīñ milte haiñ ab tak mujh jaise harjā.ī ko

ghabrā.ī kyuuñ baiThī hai ab ġham-ḳhvāroñ ke narġhe meñ

le aa.ī hai mahfil meñ jab tū apnī tanhā.ī ko

sab ko sunā.e qisse tū ne jis kī dhoke-bāzī ke

us jaisā hī pā.egī tū apne har shaidā.ī ko

sab se hans kar milne vaalī kis ne tujh ko samjhā hai

naap rahe haiñ muft meñ log samundar kī gahrā.ī ko

pāgal-pan to dekho jis din Dolī uThne vaalī thī

apne haath se toḌ diyā ik dulhan ne shahnā.ī ko

kyuuñ auroñ ke naam se chhapvātā hai apne sher 'qatīl'

yuuñ barbād kiyā nahīñ karte apnī nek kamā.ī ko

jaanch-parakh kar dekh chuki tu har munh-bole bhai ko

kahne de ab koi sachchi baat 'qatil-shifai' ko

kar diya bilkul apne jaisa mujh ko andhe cupid ne

apni shohrat jaan raha hun main apni ruswai ko

shohrat chahe kaisi bhi ho log tawajjoh dete hain

lakh hasin milte hain ab tak mujh jaise harjai ko

ghabrai kyun baiThi hai ab gham-KHwaron ke narghe mein

le aai hai mahfil mein jab tu apni tanhai ko

sab ko sunae qisse tu ne jis ki dhoke-bazi ke

us jaisa hi paegi tu apne har shaidai ko

sab se hans kar milne wali kis ne tujh ko samjha hai

nap rahe hain muft mein log samundar ki gahrai ko

pagal-pan to dekho jis din Doli uThne wali thi

apne hath se toD diya ek dulhan ne shahnai ko

kyun auron ke nam se chhapwata hai apne sher 'qatil'

yun barbaad kiya nahin karte apni nek kamai ko