jaane aazad wo din phir kabhi aae ki nahin

jaane 'āzād' vo din phir kabhī aa.e ki nahīñ

vo hameñ itnī mohabbat se bulā.e ki nahīñ

phir maiñ dīvāna banūñ vo mirā dāman thāme

yaad terī mire yuuñ naaz uThā.e ki nahīñ

phir havā taaza na kar de mere bhūle hue ġham

mujh ko palkoñ pe tirī yaad biThā.e ki nahīñ

bārhā gardish-e-daurāñ meñ ulajh kar vo bhī

sochtā hai ki mujhe dil se bhulā.e ki nahīñ

yaad kar ishq ke vo daur ki tū ne maiñ ne

dil jalā.e ki nahīñ ḳhvāb luTā.e ki nahīñ

ab ki itvār bhī 'āzād' na vīrāñ guzre

tez bārish hai ḳhudā jaane vo aa.e ki nahīñ

jaane 'azad' wo din phir kabhi aae ki nahin

wo hamein itni mohabbat se bulae ki nahin

phir main diwana banun wo mera daman thame

yaad teri mere yun naz uThae ki nahin

phir hawa taza na kar de mere bhule hue gham

mujh ko palkon pe teri yaad biThae ki nahin

barha gardish-e-dauran mein ulajh kar wo bhi

sochta hai ki mujhe dil se bhulae ki nahin

yaad kar ishq ke wo daur ki tu ne main ne

dil jalae ki nahin KHwab luTae ki nahin

ab ki itwar bhi 'azad' na viran guzre

tez barish hai KHuda jaane wo aae ki nahin