jaane kis kis ki tawajjoh ka tamasha dekha

jaane kis kis kī tavajjoh kā tamāshā dekhā

toḌ kar aa.ina jab apnā hī chehrā dekhā

aa lage gor kināre to milā muzhda-e-vasl

raat Duubī to ubhartā huā taarā dekhā

ek aañsū meñ hue ġharq do-ālam ke sitam

ye samundar to tire ġham se bhī gahrā dekhā

yaad aatā nahīñ kuchh bhī ki yahāñ duniyā meñ

kaun sī chiiz nahīñ dekhī magar kyā dekhā

ishq ke daaġh hue mahv is āshob meñ sab

TimTimātā sā charāġh-e-ruḳh-e-zebā dekhā

is ġhalat-bīnī kā koī to natīja hotā

umr bhar bahr-e-balā-ḳhez ko sahrā dekhā

koī is ḳhvāb kī ta.abīr badal de yā-rab

ghar meñ bahtā huā ik ḳhuun kā dariyā dekhā

kho ga.e bhiiḌ meñ duniyā kī par ab tak 'shohrat'

sansanā uTThā hai jī jab koī un sā dekhā

jaane kis kis ki tawajjoh ka tamasha dekha

toD kar aaina jab apna hi chehra dekha

aa lage gor kinare to mila muzhda-e-wasl

raat Dubi to ubharta hua tara dekha

ek aansu mein hue gharq do-alam ke sitam

ye samundar to tere gham se bhi gahra dekha

yaad aata nahin kuchh bhi ki yahan duniya mein

kaun si chiz nahin dekhi magar kya dekha

ishq ke dagh hue mahw is aashob mein sab

TimTimata sa charagh-e-ruKH-e-zeba dekha

is ghalat-bini ka koi to natija hota

umr bhar bahr-e-bala-KHez ko sahra dekha

koi is KHwab ki tabir badal de ya-rab

ghar mein bahta hua ek KHun ka dariya dekha

kho gae bhiD mein duniya ki par ab tak 'shohrat'

sansana uTTha hai ji jab koi un sa dekha