jaane kitnon ke liye rashk ka mehwar Thahra

jaane kitnoñ ke liye rashk kā mehvar Thahrā

terā zaḳhmī bhī to qismat kā sikandar Thahrā

lazzat dard kī baḌhtī hī chalī aatī hai

tarab-añgez bahut ek hī nishtar Thahrā

bhar ga.iiñ zehn meñ ra.anā.iyāñ ik jalve se

ho kahīñ jaise koī pariyoñ kā lashkar Thahrā

kyā shikast us ko bhalā gardish-e-daurāñ degī

ḳhaak kā Dher hī jis ke liye bistar Thahrā

merī mehmān-navāzī kā thā charchā aisā

jo bhī tūfān-e-balā aayā mire ghar Thahrā

ḳhasta-hālī se jo baunā nazar aatā thā tumheñ

vaqt jab aayā to phir kitnā qad-āvar Thahrā

nazr-e-jāñ rāh-e-mohabbat meñ bahut āsāñ hai

shart mere liye kuchh mushkil-o-bartar Thahrā

gar umañD aa.e to ġharqāb na ho shahr tamām

ye jo āñkhoñ meñ hai ashkoñ kā samundar Thahrā

kaise 'az.har' kisī sūraj ko salāmī degā

kyoñ na ho apne zamāne kā qalandar Thahrā

jaane kitnon ke liye rashk ka mehwar Thahra

tera zaKHmi bhi to qismat ka sikandar Thahra

lazzat dard ki baDhti hi chali aati hai

tarab-angez bahut ek hi nishtar Thahra

bhar gain zehn mein ranaiyan ek jalwe se

ho kahin jaise koi pariyon ka lashkar Thahra

kya shikast us ko bhala gardish-e-dauran degi

KHak ka Dher hi jis ke liye bistar Thahra

meri mehman-nawazi ka tha charcha aisa

jo bhi tufan-e-bala aaya mere ghar Thahra

KHasta-haali se jo bauna nazar aata tha tumhein

waqt jab aaya to phir kitna qad-awar Thahra

nazr-e-jaan rah-e-mohabbat mein bahut aasan hai

shart mere liye kuchh mushkil-o-bartar Thahra

gar umanD aae to gharqab na ho shahr tamam

ye jo aankhon mein hai ashkon ka samundar Thahra

kaise 'azhar' kisi suraj ko salami dega

kyon na ho apne zamane ka qalandar Thahra